ek is nog hier

Hallo aan almal. ek is nog op die planeet aarde! Het bietjie probleme met my internet gehad, maar dit is nou uitgesorteer, sal nou meer gereeld iets opsit.
Ek het ook nou 'n blog van my eie waarop ek alle skilderye en kreatiewe dinge wat ek doen opsit, so gaan loer bietjie daar.

Die bietjie dinee fotos wat ek geneem het is op Facebook, omdat 'nie-blog' lede ook in die fotos verskyn.
Maar as julle wil he sal ek dit ook op die blog sit?...

Verder gaan dit goed met ons Swan gesinnetjie. Ons gaan die naweek Naboom toe, want dit is Andre se 10jr reunie, sjoe maar ons word oud!

Marli so 'n maand terug toe ons by 'n troue in Tzaneen was.

Yolande, het jy toe gaan stap Saterdag? en was dit lekker?

Goed gaan, sal weer van my laat hoor...

ilze-mari xxx

Amper Vergete

Lank, lank gelede (16de Junie) was ek en Tinus Kaap toe om die twee nuwe toevoegings tot die Erasmus/ Maartens/ Geldenhuys ‘clan’ te ontmoet.

Natuurlik maak die Erasmusse  geen besoek aan Kaapstad sonder om ‘n besoek aan ‘n wynplaas (of twee of drie of …) te maak nie.

Skoonsus, Salome’, werk by Creation - ‘n redelike jong wynplaas wat in die Hemel-en-Aarde Vallei naby Hermanus geleë is. Die styl van die wynplaas is baie uniek. Dit is glad nie jou ‘cookie cutter’ wynplaas nie. Als het ‘n kontemporêre invloed, van die plaashuis, tot die logo en kos. En natuurlik is die wyn heerlik.

Ons het spesifiek vir hul gewilde ‘food and wine pairing’ gegaan. Die kos kombinasies is heerlik en meeste van die resepte is op hulle blog beskikbaar: http://blog.cw.com Van my gunsteling was die kool en bloukaas sop (in die klein koppietjie) en so 'n salm-chutney-dumpling dingetjie (in die wit lepel). Mmmmmm

Jul kan hul webwerf vir nog kiekies besoek: www.creationwines.com

En die' dames, is die pragtige klein Sophia McKenzie Geldenhuys. Cute ne’! Ek die kiekie geneem, want sy trek haar lippies so op 'n knop en dit is tog te oulik. En die gewaar voor ons is hul 'Trio of Chocolate' nagereg.

Ons het ook ‘n besoek aan Elisca en Karel se huisie gemaak. Dis nie elke dag wat ek kan se my vriendin bly op ‘n wynplaas nie, maar nou kan ek. J

As ek so na die kiekies kyk (ge-jas en ge-serp) is ek nes Elisca bly dat die somer besig is om toon uit te steek.

Hoop dit gaan goed met julle drietjies, my ma en Bianca kom kuier die naweek by ons en sien ek baie uit daarna.

Lekker naweek

XOXO

Yola

Dis LENTE!!!

Goeiemiddag dames!

Ek wil uit my vel uitspring - die lange winter is verby en die wingerde en akkerbome begin bot.  Selfs die menigte vrugtebome om Stellenbosch het pienk of wit blommetjies!  As 'n uit-en-uit somer mens is ek baie verheug hieroor!  Kan nie wag vir die eerste keer wat dit warm genoeg gaan wees om 'n tan in te pas nie...

Baie dankie Yola vir die dinee foto's, dit is baie lekker om dit te sien.  Wens so ek was daar!  Yola, hoe lanklaas het jy van Evette of Ilze gehoor?  Werk hulle internet nog?  Ek het net na jou post oor die dinee vir hulle gemail en gevra dat hulle ook ietsie moet opsit - dit was mos nie net jy by die dinee nie???  Maar, soos jy self kan sien, is daar nog niks!  Of dink jy dalk hulle het hulle kameras vergeet???

Yola, die make-over van julle slaapkamer het my ook nou sommer aan die dink gesit.  Ek is nou opsoek na 'n outydse katel - een van daardie ou beddens.  Die enigste probleem met dit is natuurlik altyd die prys.  Maar ek sal jou op hoogte hou van die vordering.  Ons gaan ook nou bietjie renovate en heel eerste op die lys is die badkamer!  Ek skraap nog moed bymekaar want die swamme wat uitgewis moet word, maak my sommer moeg voor ek begin!

Evette en Ilze, net vir ingeval julle nie die sarkamse in die boonste paragraaf gevang het nie, sit ek gou weer die hele doel van hierdie blog uiteen.  Dit is net sodat ons in kontak met mekaar kan bly en sommer kan sien hoe dit gaan met mekaar en wat alles aangaan in hulle lewens.  Dit vat nie ure om ietsie te post nie en dit word werklik hartlik waardeer.  Ek weet min wat daar aangaan - as dit nie vir Yola was nie sou ek niks geweet het nie!  Werk asseblief bietjie saam!  Dink terug aan die koshuis dae - hierdie is soos daardie eerste koppie koffie van die eerste dag van bloktyd as ons almal mooi weet dat ons eintlik nou lekker besig is om te procrastinate.  Deel bietjie wat aangaan in julle weke - die lekker goed en die vervelige goed.  Dis 'n maklike manier om in kontak te bly...

Aangesien dit opgehou reën het in die Kaap en ek 'n fiets gekry het vir my verjaarsdag - die winter het gemaak dat ek maar min tyd in die saal deurgebring het... - het ek en Carools besluit om sondag na die plaaslike mark toe te ry.  Gelukkig is dit nie ver nie, net so 5km.  Daar gaan ons lekker middagete kry - verskeie plaaslike kase, vars vrugte en nog beter -vars gebakte brood!!!  Dit sal natuurlik alles afgesluk word met 'n heerlike bottels Sauvignon Blanc... mmmm!  Ek sit maandag vir julle foto's op.

Elisca

Oormaak en mooimaak

Die was een van ons vele dekor projekte en ons het dit uiteindelik so twee weke gelede klaar gemaak. Ons was basies vir ‘n jaar besig om aan ons hoofslaapmaker te werk. Om twee mense te kry om oor dekor saam te stem is nie maklik nie.

Hier is ‘n paar kiekies van die finale produk:

Die bed het ons vir spot goedkoop gekry by Madisons. Was oorspronklik net opsoek na ‘n kopstuk, maar toe kry ons ‘n hele bed vir dieselfde prys. Bonus van die nuwe bed is die ekstra pakplek onder die bed.

Die beddegoed en duvet is van Boardmans. Het dit as trou geskenk gekry. Die beddegoed is van hul Hotel Collection en is verseker elke pennie werd (maklik gese as jy nie daarvoor betaal het nie).

Bedlampies is van Mr Price en die lampskerms van Builders Warehouse.

Die fotorame het ek by Pick ‘n Pay Hyper gekoop.

Die grys  gordyne is van Woolworths  en die kant gordyne is met komplimente van my ma’le.

Die crème del crème van die hoofslaapkamer is natuurlik die bedkassies. Ek en Tinus het die hele Johannesburg vol gery opsoek na die babies. Nou dit is wat ek noem Colonial Contemporary bedkassies.

Ons is nog opsoek na die perfekte swart en wit Nguni vel om voor die bed te gooi.

Die gastekamer is volgende op die lys. Die bed en lessenaar is uitgesorteer, wag net vir die matras om vanmiddag afgelewer te word.

Word from the wise (ek wens): Enkel matrasse is belaglik duur en jy kry nie jou dubbel bed se basis verkoop nie, so koop reg van die begin af. En dit help om ‘n jonger sussie te he aan wie jy al jou ‘previously loved’ meubels kan verkoop.

Wil net dankie se aan my handige man en dat hy so betrokke en geduldig was, maar moet asseblief nooit weer ‘n hammer optel nie. Dink nie my senuwees (en die huis se mure) sal dit maak nie.  

Natuurlik word hierdie projek met vele ander vervang en die lys is nimmereindigend en besef ‘n mens net weer aardse besittings is maar net ‘n gejaag na wind. Maar vir nou sal ek my nuwe kamer geniet.

XOXO

Yola  

 P.S. - Ilze, een van die nuwe goed op my lys is 'n uitstappie na Pretoria se dieretuin. Wag net vir die somer en dit sal lekker wees as jul kan saam kom. Pretoria se dieretuin is baie moeier as Johannesburg sin.

P.P.S - Evette, jy natturlik baie welkom om ons te join.

P.P.P.S - Elisca, dankie vir my poskaart, maak elke keer my dag : )

Katte Feesdinee Deel 1

Goeie middag dames

Ek besef nou eers hoe min kiekies ek van die dinee geneem het. Oopsie! Dus het ek die post as Deel 1 benoem, sodat Evette en Ilze-Mari ook 'n paar kiekies kan bylas.

Die dinee was by 'n stunning restuarant, Stone Cradle. Ons sal verseker weer soentoe gaan vir die heerlike buffet. Was uit-en-uit die moeite werd om te gaan!

By die Erasmus huishouding gaan dit goed. Ons nou finaal ons hoofslaapkamer oorgedoen. Hou die blog dop daarvoor.

Het lekker geshop die naweek. Weet nie of julle gesien het nie, maar al die winkels is op uitverkoping! Rage het die mooiste bootse.

Was Sondag weer by die Rooftop Market in Rosebank. Lekker kaas en vars brood gekoop vir 'n kaas en wyn middagete. Die wyn was van Creation. My skoonsus, Salome' werk daar. Hou die blog ook dop vir 'n post oor Creation.

Jammer dit is so kort en kragtig, maar ek sit met 'n massive migraine en die creative juices wil nie flow nie.

XOXO
Yola

Die BELOOFDE post...

Dag Dames!

Kyk, vandag moet julle regtig die ketel gaan aansit en koekies saam met die koffie geniet!  Dit is vir twee redes - eerstens, my vakansie gaan nou aan julle onthul word en tweedens wil ek alles hoor van die dinee!  En ek bedoel nie net dat Yola moet post nie(vang die skimp, Evette en Ilze).  Hierdie post oor die dinee sal vergesel moet word met vele kleurfotos!  Ek sien uit om dit te lees...

Nou goed, kom ek begin by die begin.  My vakansie het maar baie on interessant begin - 'n week elke aand by Rust en Vrede.  Maar die lekker ding was natuurlik die aand toe ons toegemaak het vir die winter vakansie - ek het paar bottels regte-egte Franse Champagne huis toe gevat!  Ek en Carel het lekker giggelrig geraak voor die kaggel daardie aand.  Een ding moet ek wel sê - Champagne proe baie beter as dit wel Frans is...

Daarna het ek vir twee weke by prokureurs firma in die Paarl gewerk.  Het dit vreeslik geniet!  Dit was net weer 'n motivering dat ek wel die regte besluit gemaak het.  Is nou baie opgewonde om uiteindelik klaar te swot en die besigheidswêreld te betree.

In die laaste week van vakansiewerk het my ma'le ook bietjie in die Kaap kom kuier.  Het hulle maar net in die aande gesien.  So, ons het baie gaan uiteet.  Probeer nogsteeds die ekstra gewig afskud...

Die lekker het toe nou na die vakansiewerk begin!  Is vir 'n week Mosselbaai toe, na Carel se ouma se strandhuis.  Was die eerste 2 dae bietjie kouerig, maar daarna het ons die lekkerste weer gehad!  Ons het elke dag op die strand gaan stap en sommer net gerus.  Ouma het ook so na die einde van die week kom kuier, en het netso lekker met haar gekuier!  Sy het regtig 'n hart van goud.

Terwyl ons daar was het ons eendag na die Oesterfees gery.  Dit is in Knysna.  Eet nie regtig oesters nie, maar het gedink dit kan dalk interessant wees.  Was nou glad nie so great nie!  Oppad terug huis toe het ons by die mooiste ou Engelse kerkie gestop in Belvidere.  Die woonbuurt kyk uit op die Knysna meer - vreeslik  mooi!

Ons het besluit om die laaste week sommer net rustig by die huis te wees.  Ek het so paar DIY dingetjies om en in die huis gedoen - dit vat vrek baie tyd! So, alles is nog nie klaar nie, maar dit is darem al aan die gang!  Die laaste naweek van die vakansie was die Bastille fees aan die gang in Franschhoek.  Dit is nou definitief iets om by te woon!  Franse kase en die hele dorp is rooi, wit en blou!  Die weer het ook mooi saamgespeel.  Ongelukkig het Carel gedraai en het ons eers 1 uur die middag daar aangekom.  Ons het sommer net so bietjie rondgeloop en voor ons huis toe is 'n plekkie in die restaurant gekry.  Het lekker kaas bord bestel met vars brood en lekker koue vleise, natuurlik afgesluk met goeie bottel wyn!

Ek hoop gou 'n update van die dinee te kry!

Baie liefde,

xxx

Knoop in my oor

Dag Dames!

Ek sal binnekort weer ietsie op die blog sit, maar die blonde oomblikke raak nou meer gereeld!  Ek bly vergeet om die kamera te vat!  Dit is my opregte belofte dat dit voor die einde van die week sal plaasvind.

Hoe hou julle van die nuwe agtergrond?  Het gedink ons almal is redelik pre-occupied met die dinee en die dinge wat daarmee saamgaan dat ons die agtergrond sal waardeer.

Sterkte met die week, ons gesels gou weer!

E

xxx

Dinee Dilemma

Goeie dag dames

Met die dinee op ons hakke loop die dilemma's hoog (soos gewoonlik met enige formele 'outing' in die winter).

Hier is my 'outfit inspirations' so ver vir die dinee:

Opsie 1: Maxi met leer baadjie

Ek het 'n pragtige grys rok (met komplimente van 'n 'fashionable' vriendin), maar nie 'n leer baadjie nie. Het 'n baie mooi een by Truworths teen 'n baie mooi (Sarcasm font) prys gesien.

Opsie 2: Pienk en pers

Die 'colour blocking trend' is 'huge' oorsee op die oomblik en ek kan nie wag om daarmee te eksperimenteer nie. Ek het 'n pienk lang romp, maar kort 'n pers toppie om daarmee saam te gaan. Glo my, dit is nie maklik om somers klere in die winter te kry nie. 

Soos vroeer die week met Evette bespreuk is die dilemma nie wat om aan te trek nie, maar wat om aan te trek en nie te vries nie.

Die dinee dwing (met 'n bree glimlag) my nou om Saterdag Sandton toe te gaan om die noodsaaklike itempies aan te skaf.

Behalwe vir die dinee dilemma gaan dit goed in die Erasmus huishouding, vries net van die koue in Johannesburg. Ook lekker besig by die werk. Ek se lekker , want dan gaan die dae vinnig verby.

Evette: Wie vergesel jou nou na die dinee toe? :)

Ilze: Jy toe ietsie iewers kon leen vir die dinee?

Elisca: Moenie vir Carel luister nie en trek jou jean baadjie aan, ons is net een keer jonk.

Lekker daggie dames en mis julle baie.

XOXO

Yola

Parys

So 'n tydjie terug was ek en Bianca Parys toe vir die dag. Ons het niks beplan nie, net in die kar geklim en gery. Was lekker om iets meer onbeplan te doen, soos jul goed weet is dit glad nie in my natuur nie.

Parys is bekend vir al die oudhede en antiques, en ek kan wil jul se dat dit met goeie rede is. Ons het vir ure van winkel na winkel gestap. Of van huis na huis, aangesien al die winkels in ou huise in die hoofstraat is.

Die weer het gelukkig saam gespeel, dus kon ons middagete lekker in die buitelig geniet. Ons het op 'n kunsgalery met 'n klein restaurantjie afgekom wat die heerlikste ciche bedien.

Eers aan die einde van ons uitstappie het ons al die lekker restaurante en winkels ontdek. (Het regs in die hoofstraat ingedraai in plaas van links. Dis seker waar 'n bietjie beplanning handig te pas sou wees.)

Dis nou waar ons die lekkerste lekkergoed-, kaaskoekwinkel en vetkoek paleis ontdek het. Sal volgende keer daar gaan vir middagete.

Net 'n wenk vir die wat Parys in die toekoms wil besoek, die winkels maak so rondom 2uur op 'n Saterdag toe. Uit my ondervinding sal ek aanbeveel om vroeg vir ontbyt te gaan, bietjie inkopies te doen en dan te koek-en-tee voor jul die pad terug aandurf. So kry jy die beste uit Parys.

Lekker week vir jul dames en mis ons regte egte koffie kuiers.

XOXO
Yola

Verskoning...

Ek vra groot omverskoning... Sien julle, ek sien dit eers 'n week nadat jy my uitgetrap het. Jammer ek is so onaktief met die tegnologie en geen rede sal goed genoeg wees nie, maar ek is regtig verskriklik ongelooflik hartbrekend jammer.  Dis nie dat ek van julle vergeet het nie, ek dink amper elke dag aan julle en ek MIS JULLE BAIE!!!

My verskoning aanvaar?

Met ons gaan dit goed. Kry ook koud hierdie kant van die berg. Andre is besig om vir hom 'n assistent te soek, maar dit is baie moeiliker as wat ons gedink het. Hy verkies 'n vrou tussen 25 en 40. Of haar CV lyk nie goed nie of hy hou nie van haar persoonlikheid nie. So hierdie week moet die kantoor by die huis getrek word na die erf waar die trokke is.
My babatjie het Maandag teen die trap haar lip oopgeval, darem nie nodig vir steke nie. Haar ma het groter geskrik van al die gehuil en bloed. Sy begin te oulik woordjies praat, nie juis die maklikste woorde nie: lepel, zebra, zip, seep...
Ek is besig om 'n landskap vir ons sitkamer te skilder, waarvoor Andre al lank vra. Sal foto stuur as dit klaar is.

Ai, kon julle almal nie maar nader gebly het nie... Onthou julle verlede jaar ons kaas en wyn aand? Mmmm. Wanneer kom jy bietjie hierdie kant toe Evette, vir 'n girls night?
Nou moet elkeen van ons maar op ons eie die winter trotseer met 'n koffie in die hand. Ek het nou die aand 'Sex and the City' gekyk, toe laat dit my dink aan ons vier. Nie die dinge wat hulle aanvang nie, maar net die vriendskap.

Sal gou weer van my laat hoor.
Lekker dag vir julle
xxx ilze-mari

SKANDELIK!

Evette Venter, wanneer hoor ons weer iets van jou???

Ilze-Mari Swan, het jy saam met Evette van die aardbol af verdwyn???

Dit sal baie nice wees as julle twee dalk moontlik weer bietjie van julself kan laat hoor.  Sover is ek en Yola besig om die blog te flood en julle twee sit net niks op nie - SIES, SKAAM JULLE!

La La St Lucia

Soos julle weet was ek en Tinus so paar weke terug (25 April – 2 Mei) in Zululand. Ons het langs die St Lucia meer by ‘n lodge gebly (Nibela Lake Lodge). Die lodge is so +/-65 km van St Lucia af en so +/- 45 km van Sodwona af (basies in die middel van die twee dorpies).

Ons eenheid het die beste uitsig van die meer gehad. Die hele lodge is op hout stellasies gebou, dus loop jy letterlik tussen die bome.

Die weer was baie lekker (enige weer is beter as dit wat ons tans in Johannesburg beleef), Baie sonskyn en die humiditeit was nie eers so erg soos wat ons verwag het dit gaan wees nie.

So mooi en lekker soos wat dit was, het ek net weer eens besef ek is nie ‘n plaasmeisie nie. Van Boomslange, ape en spinnekoppe het ek genoeg gehad. Skoon gevoel of ek in Jumanji was.

Ons was die Woensdag deur Sowdana toe om bietjie in die warm see te swem. Dit was my tweede keer wat ek in ‘n warm see swen. Die eerste keer was donkie jare terug by Ballito.

Die Donderdag was ons saam met ‘n ‘local’ op ‘n ‘day trip’ van St Lucia. Dit was ‘n baie interessante dag. Dit het vroeg begin (kwart oor 4) en eers laat die aand geeindig. Ons toerbus bestuurder kon slegs Zulu praat en het bietjie aangeklam gelyk. Ons het hom toe maar die ‘benefit of the doubt’gegee aangesien dit half 6 die oggend was (ek moet byvoeg dat hy ons amper 45 min laat opgetel het by ons lodge). In die bussie en op die grondpad het ons besef hoekom hy so laat was, 30km/uur op ‘n grondpad van 23km!

Ons was eerste by Hluhluwe Imfolozi National Park op ‘n 3ure wildrit. Was baie trots op myself, want ek het ‘n hele paar diere gesien wat ons gids nie raakgesien het nie.

Daarna was ons op ‘n boottrip vir 2ure en ‘n magdom krokodille en seekoeie gesien. Wat vir my meer amusant was was ‘n Britse toergroep wat saam met ons op die boot was. Die een is bleeker as die ander een en elkeen het sy eie verkyker, kamera en video kamera gehad. Het lekker gelag elke keer as die gids ‘n seekoeie of krokodil uitwys en hulle nie weet of hul na die kamera of verkyker moet gryp nie.

Toe is ons na ‘n Zulu ‘village’ toe en so bietjie van hul tradisies besigtig.

Laaste was ons na ‘n luiperd en wildekat plaas toe.

Die res van die week het ons net by die lodge rongehang en ‘cocktails’gedrink.

Het so lekker uitgerus dat ek lus was om terug te kom stad toe. Die gevoel het nie lank gehou nie, net totdat ons die eerste ongeluk op die N1 gekry het en botstil moes staan (na’n alreedse 9ure op die pad).

Elisca: Ons land die 16de Junie in die Kaap en vertrek weer die 19de. Sal nader aan die tyd ietsie reel. Sien baie uit!

Evette en Ilze-Mari: Ek sal eers volgende week my dinee kaartjies betaal en bespreuk. Dit gaan so bietjie hectic hier by ons op die oomblik. Sien ook baie uit na die dinee!

XOXO
Yola

P.S. - Hoop julle het almal gestem vandag : )

Sondagaan...

So begin ek en Carel die sondag luilekker - slaap tot amper middagete.  Toe ons uiteindelik begin regmaak vir die dag, lui my foon.  Die persoon wat toe bel is Neil - my baas by Rust en Vrede.  Eerste gedagte wat toe in my kop pop is 'Wat de hel het ek verkeerd gedoen???'.  So antwoord ek die foon met 'n baie klein stemmetjie en hartjie wat baie wild klop.  Dit was toe glad nie slegte nuus nie, maar eerder 'n baie groot verrassing.  Roxette het vrydagaand in die restaurant geëet en toe vir al die personeel kaartjies gestuur!  Ek en Carel moet 7h by Grand West Casino aanmeld vir ons gratis kaartjies!  Ek en Carel spring toe soos klomp mal hase op en af van opgewondenheid!  ONS GAAN ROXETTE KYK!

Hier het ons vir Marisa en haar outjie, Dirkie.  In die middel is Minette, die pastry chef by Rust en Vrede, en dan daar op die einde is ekke.

So dink ons dit is seker maar daardie kaartjies waar jy in elk geval niks gaan kan sien nie.  Groot was die opwinding en nog groter was die verbasing toe ons die kaartjies sien -Golden circle!  En daardie groen disks wat ons met sulke groot smiles vashou is backstage passes om die band te ontmoet!!!

Het hierdie show vreeslik geniet!  Al die ou favourites is gesing, en van hulle het my sommer terug gevat na ons koshuisdae...

Na die show het ons na so klein kamertjie gegaan en vir Roxette gewag.  Ek het nie geweet sy is al 50 jaar oud nie!  Sy het ook onlangs 'n breinoperasie gehad en kon nie te wild dans nie.  Was defnitief 'n aand om te onthou!

Hier is ons in die kamertjie, drink bier en eet kaas terwyl ons wag.  Van links af is Vikki, ek in die middel en Tamsin aan die regterkant.

So saam met die lekker naweek planne moet ek ongelukkig ook nou bietjie slegte nuus oordra.  Ons sal ongelukkig nie meer die dinee kan maak nie.  Ons het bietjie na ons kalender gaan kyk en besef dat daar menigte troues, oupa se 70ste verjaarsdag in Bloemfontein, Carel se fietsryresies en dan dalk nog 'n trippie JHB toe vir sy beurs is wat ons geld gaan kos - so die punt is, ons kan dit letterlik nie bekostig om op te vlieg nie, want daar is heeltemal te veel ander goed wat plaasvind.  Ons is so jammer dat ons dit gaan mis!  Julle moet maar dans en te veel rooiwyn en tequila drink vir ons part ook!

Evette, jy skuld my nou 'n kuier in die Kaap.  Ilze was so rukkie terug hier, Yola sien ek in Junie maar jou kuierdatum is vir my nog onbekend.  Laat weet my asseblief!

Sterkte met die week!

xxx

Feesdinee!!!

Hallo Almal!

Ek moet nou eerlik wees en sê dat ek baie verbaas was om te sien dat daar alweer 'n feesdinee is - raak ons so oud???  Ons was by ons eerste feesdinee in ons eerste jaar, onthou  julle nog?  Vir die wat al bietjie vergeet het, hier is so ou foto'tjie van die goeie ou dae...

Soos ek vir julle in die sms gesê het, die vliegtuigkaartjies vir daardie naweek is nog lekker spotgoedkoop!  Dis hoekom dit so dringend is dat ek moet weet of ons wel gaan, laat ek so gou as moontlik kan bespreek voor iemand weer besluit die petrol moet duurder word...

Die dinee is die eerste naweek na die universiteit weer begin het, so ons het gedink ons vlieg sommer die donderdagaand al op Jozi toe - daar is mos nie regtig veel werk wat in die eerste week van klas gedoen word nie...  Dan woon ons die dinee die vrydagaand by(what to wear???), kuier nog daar in die omgewing rond die saterdag, sondag en maandagaand klim ons weer op die vliegtuig terug kaap toe - behoorlike besige naweek wat voorlê!

Ek sien baie uit daarna om van julle te hoor, en sien nog meer uit om julle te sien!

Geniet die naweek!

O ja, as julle iets opwindend doen, vang dit vas op kamera en blog dit!

ciao  xxx

Herfs in Stellenbosch

Hallo almal!

Ek moet net weer baie beskeie om verskoning vra vir die lang stilte.  Na die vakansie het die toetsreeks my getref soos 'n groot geel Metro trein, maar die einde is darem in sig en dan sal ek baie meer aktief wees.

Ek het maar gedink om vir julle, net so vinnig, te wys hoe mooi Stellenbosch is in die herfs.  Geniet elke oomblik!  Moet sê, het amper dood gegaan van die hitte die somer, so sien baie uit na die winter!

Vir die wat nie my email ontvang het nie, ek het 'n nuwe posadres - posbus 3192, matieland, 7602.  Blykbaar kan mens enigiets in die pos gooi, soos bv sjokolades.  As julle dit moontlik dalk wil toets, ek is 'n baie gewillige guinea pig!

Verder het ek nie groot nuus nie, skoonouers kuier bietjie by ons.  Hulle gaan vanaand Niel Diamond kyk in Groenpunt stadion, en dan is hulle weer oppad huis toe dinsdag.  Ek en Carel lag lekker in ons mou - ons het besluit om hierdie desember net vakansie te hou.  Hy begin mos nou werk in januarie en het nog nooit die see oor 'n desember beleef nie.  So ons gaan eers bietjie saam met sy ouma Mosselbaai toe en dan bietjie later saam met my ouers Langebaan toe.  Dit is mos oestyd oor desember en gewoonlik word almal mos aan die werk gesteek in die stoor.  Met die dat ons die vakansie ding gaan doen, gaan ons nie werk die desember nie.  En elke keer wat Carel se ouers ons sien, skimp-skimp hulle so dat ons moet kom werk('wat gaan julle hierdie desember vakansie maak?') - ons het hierdie vraag seker al 12keer geantwoord!

Ilze, ek is baie opgewonde oor julle kuier!  Sodra julle in die Kaap is kan ons bietjie gesels en 'n kuiertjie reël.  My ma'le kuier ook hier daardie week, maar klink vir my sy wil die kaap se winkels leeg koop!  Ons het geen planne om enige plek te gaan nie, ons is hier rond en sal verseker bietjie gesels nader aan die tyd!

Sterkte met julle week, ek sal bietjie later meer interessante fotos hê.

Baie liefde,
Elisca

What a beautiful noise...

Ons almal weet daar is min 'outings' so lekker soos 'n 'live concert' - en as die man op die verhoog een van die grootste album-verkopers OOIT is (net Tannie Elton John het meer), wat anders kan gese word as: WOW!


Ek het die kaartjies eintlik so 'by the way' gekry en nou nie regtig baie opgewonde gevoel daaroor nie. My ma en haar bff aan die ander kant...soos graad 8's uitgesien na hulle eerste sokkie (my ma reken vanoggend sy voel STEEDS 30jaar jonger - haha)! Pa was oorspronklik bietjie skepties oor Soweto, maar pak 'n lekker koelhouer en paar snacks en dan is enige geleentheid 'n fees! Ek dink nie Soweto het al OOIT so baie wit, afrikaanse mense bymekaar gesien nie! Meeste het hulle braaiers en kampstoele reeds van 3uur af uitgepak, Oom Neil in die agtergrond.

Ons het kaartjies gehad vir die cheap seats daar doer bo. Met die eerste liedjie het ons egter besef hier is GROOT fout met die klank: was dit nie vir die feit dat hy sy grootste hits eerste gesing het nie, sou ek niks kon herken nie.

 Eers nadat ons weer teen al 5 vlakke se ramps af is tot grondvlak en onsself onwettig ingewurm het, kon die konsert begin. 4 'sweet carolines' later, toe is ons aan die brand en dans asof ons reeds in 1970 vir die diamant ontdek het!

Uncle Neil op sy beste!

En nou wonder julle seker 'waarom geen foto's van ons?'. 'n BAIE goeie verduideliking: ek het dit ook goed gedink om voor te stel (behalwe nou Yola wat al ontmoet het):

Dames, ontmoet vir Marnus Truter:

No caption needed...enough said (-;
(En as julle nou dink 'Evette hou seker van die kort hare' - 100% MAL daaroor!)

"Sweet Caroline, who-oh-oh, good times never felt so good!"

 

En dis ons 'crazy companions' - Chandre en Hamilton!